Bezirksmeisterschaften Aktive: 1*1 + 4*2 + 6*3

Folgend ein weiterer Beitrag zum Thema "Wir können nicht nur Hochdeutsch": Hoidenei was isch denn do am ledschde Wocheend bassiert?

Do hot doch sellre Flo Schteeeling glatt amol di ganz Beglass aufgmisschd ond mid eme saubere Dorchmarsch älle soine 7 Oinzel gwonne. Dabei hod er onder anderem de Sega Robert ond der Klemann Didi vom Disch gfegd, als obs koi Morge gäb. Des gibd en Haufe TTR-Ponkt, mol gugge, als I de Brichd schreib, send se no ned em Syschdem. Ond zom vo Hand ausrechne ben i jedzd z‘faul!

Ond mid em Sadz „Ich kann mich ja nicht selber loben“, muos er jedzd zwar den Brichd ned schreibe, aber halt mid dem läbe, was I so von mer gäb. Nadürlich muss I do erwähne, dass er im Dobbel wohl ned alles gäbe hod, anders hädded de Thomas ond de Frank koi Chance ghed. Obwohl ses immerhin no zome dridde Platz brochd hend.

Des hend au no dr Herr Annette (so a scheene Urkund), d‘Bettina, de Pradeep, de Colin mid em Moritz ond Annette mit dr Bettina gschaffd.

Zwoide Pläds hend sich d‘Nina, de Q, der hod dadsächlich bei de Seniore midgschbield, der Q mid em Pradeep ond Nina mid em Daniel ghold.

Zom Schluss no an kloiner Gruoß an da Anastasios, der des Ganze prima veranschdalded hod. Soweit isch älles prima glaufe, aber fors zehle vom Dobbelendschbiel braucht mer ned grad d‘eldeschd Schbieler ond dann no vom oigene Verei nomminiere. Ond dann ensbesondere ned, wenn mor dem vorher en scheene Sieg im Dobbel als Niederlag im mktt nei tibbt hod.

Wär des jetzt ned verstande hot, där kohs hier sälber rausfende.

Liebe Grüße an Noël!

Viele weitere Bilder der BZM gibt's in unserer Galerie.